Ramaphosa, Dlamini-Zuma kuchuana uongozi wa ANC

Chama tawala nchini Afrika kusini,  ANC kinafanya uchaguzi mwishoni mwa juma, unaoonekana kuwa mgumu, kumchagua mrithi wa kiongozi wake Jacob Zuma, ambapo mshindi  pia atakuwa na nafasi ya kuwa  rais mpya wa nchi hiyo.

Chama  cha  ANC  kitamtangaza  mrithi  wa  rais  wa  sasa  Zuma kuwa  kiongozi  wa  chama  Jumapili (17.12.2017), kikikamilisha mpambano  mkali  wa  kuwania  uongozi  ambao unatishia  kukigawa chama  hicho  ambacho  kilianza  kama  vuguvugu  la  ukombozi miaka  105  iliyopita, ambacho  kimekuwa  madarakani  tangu mwaka  1994.
Makamu  wa  rais Cyril Ramaphosa , mwenye  umri  wa  miaka 65, ambaye  kwa  kiasi kikubwa  anapendelewa  na  masoko  ya  fedha, na  Nkosazana Dlamini-Zuma, mwenye  umri  wa  miaka  68, waziri  wa  zamani  na mwenyekiti  wa  halmashauri  ya  Umoja  wa  Afrika  wametamalaki katika  mpambano  huo.

Makamu wa rais Cyril Ramaphosa

Sarafu  ya  Afrika  kusini  ya  rand imekuwa  imara  kwa  asilimia mbili  baada  ya  mahakama  kutoa  hukumu  kwamba maafisa waandamizi  katika  majimbo  mawili walioonekana  kumuunga mkono  Dlamini-Zuma walichaguliwa  kinyume  na  sheria  na hawataruhusiwa  kuhudhuria  mkutano  huo.
"Ishara  za  mapema za ushindi  kwa  Cyril Ramaphosa, ambaye anapendelewa  na  wawekezaji  zaidi, ametoa  usaidizi kwa  sarafu ya  rand," John Ashbourne , mtaalamu  wa  uchumi  wa  Afrika  katika taasisi  ya  Capital Economics  amesema.
"Lakini  wakati Ramaphosa anaungwa mkono  kwa  kiasi  kikubwa miongoni  mwa  wanachama  wa  chama  hicho, matokeo yataamuliwa  na  watu  wa  ndani kisiasa, ambao  huenda wakaamua  kumuunga mkono  mpinzani  wake mfuasi  wa  siasa  wa mrengo  wa  kushoto, Nkosazana Dlamini-Zuma.

Nkosazana Dlamini-Zuma

Ramaphosa  alishinda  kwa  wingi  wa  kura  za  kuteuliwa  kuwa kiongozi  wa  chama, lakini  wajumbe  katika  mkutano  huo ulioanza JumamosiDisemba  (16-12  hadi 20.12.2017) mjini  Johannesburg hawafungwi na kura alizopigiwa  na  tawi la  chama  cha  ANC lililomteua  kuwa  mgombea  wao, ikiwa  na  maana  kwamba  bado haiko  wazi  iwapo  anaweza  kushinda  nafasi  hiyo.
Ramaphosa  ameongeza  hivi  karibuni  ukosoaji  wa  serikali  ya Zuma  iliyogubikwa  na  kashfa, wakati Dlamini-Zuma  amesema umuhimu   wake  anauweka  katika  kuboresha  uwezo  wa  Waafrika waliowengi.
Waungaji mkono Ramaphosa
Kwa  waungaji  wake  mkono, mafanikio  ya  Ramaphosa  kibiashara yanamfanya  kuwa  katika  nafasi  nzuri  ya  jukumu  la  kubadilisha hali  ya  uchumi  wa  nchi  hiyo  inayokabiliwa  na  ukosefu  wa nafasi  za  ajira  kwa  asilimia  28  ya  watu pamoja  na kupunguziwa viwango  vya  uwezo  wa  kukopa.